दुप्सेङ्ग रिन्पोछेले बीसीसी गुम्बामा दिए धार्मिक प्रवचन

लण्डन- बेलायत भ्रमणमा रहेका पोखरा हेम्जास्थित जङ्गचुब छोइलिङ गुम्बाका श्रद्धेय गुरु हिज इमिनेन्स दुप्सेङ्ग रिन्पोछेले अल्डरसटस्थित बीसीसी गुम्बामा प्रवचन दिएका छन् ।

उनले गत ६ जुलाई आइतबार कर्म र त्यसको परिणामबारे धार्मिक प्रवचन दिएका हुन् ।

सो अवसरमा बीसीसी यूकेका अध्यक्ष आङ्गदावा शेर्पाले बीसीसी यूकेले हालसम्म गर्दै आएका विभिन्न सामाजिक, धार्मिक तथा परोपकारी कामहरुबारे जानकारी गराउँदै स्वागत गरेका थिए ।

बीसीसी यूके कार्यसमिति र आमाहरुले रिन्पोछे गुरुलाई मण्डला अर्पण गरे ।

त्यस्तै, बीसीसी यूके अध्यक्ष शेर्पा र आमा प्रमुख जगना गुरुङले श्रद्धेय रिन्पोछेको परियोजना सहयोगार्थ बीसीसी यूकेको तर्फबाट एक हजार पाउण्ड हस्तान्तरण गरे ।

उक्त कार्यक्रममा बीसीसी यूकेका प्रमुख लामा खेन्पो सेनाङ्ग, खेन्पो फुर्तेम्बा, लोपन सोनमलगायत अतिथि गुरुहरुको समेत सहभागिता थियो ।

सोही कार्यक्रमा बीसीसी यूकेका संरक्षक, हिज होलिनेश १४ औं दलाई लामाको ९० औं जन्मोत्सव समेत मनाइयो । 

उक्त कार्यक्रममा बीसीसी यूकेका उपाध्यक्ष मेजर हितमान गुरुङले हिज होलिनेशको जीवनी छोटकरीमा बताए । लामो आयुको पूजा र प्राथनासहित शुभकामना ब्याक्त गर्दै उनको जन्मोत्सव भब्यताका साथ मनाइएको थियो।

बीसीसी यूकेका उपाध्यक्ष एवं कार्यक्रम संयोजक रोबिन गुरुङले कार्यक्रमको अन्त्यमा श्रद्धेय रिन्पोछेलगायत सहभागी सबैलाई धन्यवाद ज्ञापन गरे । 

बेलायतका विभिन्न स्थानमा बसोबास गर्ने भक्तजनहरुको उल्लेखनीय उपस्थिति रहेको सो कार्यक्रममा बीसीसी यूकेका संस्थापक अध्यक्ष लेप्टन काजी शेर्पा, पूर्व अध्यक्षहरु लेप्टन नारायण प्रसाद गुरुङ बीएमई, नरेश गुरुङ, धर्म तामाङ, हर्क गुरुङ, प्रमुख सलाहकार मेजर खुशीमान गुरुङ, संस्थापक आमा प्रमुख ज्ञानुमाया गुरुङ, निवर्तमान आमा प्रमुख उर्मिला गुरुङलगायत कार्यसमिति, आमाहरुलगायत भक्तजन सहभागी थिए ।

श्रद्धेय गुरु हिज इमिनेन्स दुप्सेङ्ग रिन्पोछेको प्रवचन, हिज होलिनेश १४ औं दलाई लामाको ९० औं जन्मोत्सव, दोर्जे लुङ्ग्रीक रिन्पोछेद्वारा झिन्सेक पूजाले गर्दा त्यसदिन विशेष रहेको भक्तजनहरुको भनाइ थियो ।

बीसीसी यूकेका अध्यक्ष शेर्पाको अध्यक्षतामा सम्पन्न उक्त कार्यक्रम महासचिव मेजर कुमार गुरुङ ‘एमभिओ’ ले सञ्चालन गरेका थिए ।