एनआरएनए इंग्ल्यान्डमा इतिहास रच्ने अठोटसहित अहिल्याले गरिन् अध्यक्ष उम्मेदवारी घोषणा

लन्डन। बेलायतको नेपाली समुदायकी सक्रिय महिला अभियन्ता अहिल्या कुंवरले गैरआवासीय नेपाली संघ (एनआरएनए) इंग्ल्यान्ड राज्य समन्वय परिषदको अध्यक्ष पदमा उम्मेदवारी घोषणा गरेकी छन् ।

परिषदमा लगातार दुई कार्यकाल सचिव र त्यसअघि एक कार्यकाल सदस्यको जिम्मेवारी सम्हालिसकेकी अहिल्याले पहिलो महिला अध्यक्षको इतिहास रच्ने अठोटसहित अध्यक्षमा उम्मेदवारी दिने घोषणा गरेकी हुन् ।

‘एनआरएनए इंग्ल्यान्डको संस्थापन समितिदेखि नै लगातार महत्वपूर्ण जिम्मेवारी सम्हाल्दै आएकी छु । शुरुमा कार्यसमिति सदस्य हुंदा नै एतिहासिक जनगणना अभियानको संयोजकका रुपमा नेतृत्व गर्ने मौका पाएं । त्यसपछि लगातार दुई कार्यकाल सचिवको रुपमा मेरो क्षमता र सामर्थ्यले भ्याएजति योगदान दिने कोशिस गरें’, आफ्नो अध्यक्ष उम्मेदवारीबारे उनले भनिन्, ‘अहिलेसम्मको सिकाइ, बुझाइ र अनुभवपछि अब संस्थालाई चाहिनेजस्तै कुशल र सबल नेतृत्व दिन सक्छु भन्ने आत्मविश्वास बनाएकी छु ।’

परिषदको पहिलो महिला अध्यक्षका रुपमा इतिहास रच्ने दृढ अठोट अहिल्यासंग छ । ‘एनआरएनए यूकेदेखि केन्द्रसम्म महिलाले नेतृत्व गरिसक्नुभयो । अब इंग्ल्यान्ड राज्य परिषदमा पनि नयाँ इतिहास रच्ने मौका आएको छ । मलाई विश्वास छ, यो यात्रामा मलाई सबै अग्रज, अभियन्ता एवम् समुदायका सदस्यहरुले साथ र हौसला दिनुहुनेछ’, उनले भनिन् ।

एनआरएनए इंग्ल्यान्डको अध्यक्ष उम्मेदवारका रुपमा मैदानमा उत्रिदै गर्दा अहिल्याले एनआरएनए अभियानमा महिलाकै मुद्धालाई आफ्नो प्राथमिक एजेन्डा बनाएकी छन् ।

‘हामी सबै गैरआवासीय नेपालीहरुका लागि यति धेरै महत्वपूर्ण यो एनआरएनए अभियानमा अहिलेसम्म पनि धेरै दिदीबहिनीहरु जोडिन नसक्नु विडम्बनाको विषय हो’,अहिल्या भन्छिन्, ‘आम दिदीबहिनीहरुलाई यो अभियानमा जोड्न र सक्रिय रुपमा सहभागी बनाउनमा मेरो प्रमुख जोड रहनेछ ।’

इंग्ल्यान्डजस्तो देशमा बस्ने भएपनि धेरै नेपाली महिलाहरुको सशक्तिकरणका लागि अभियान गर्नुपर्ने आवश्यकता उनले महशुस गरेकी छन् । ‘महिलालाई समाजमा बाहिर ल्याउने कुरा त छंदैछ । कतिपय दिदीबहिनीले परिवारभित्रै हिंसा र शोषण व्यहोर्नुपरेका छ। मेरो प्रतिवद्धता त्यस्ता दिदीवहिनीहरुलाई हिंसाविरुद्ध आवाज उठाउन र न्याय खोज्नका लागि प्रेरित गर्नेछु र आवश्यक सहयोग दिलाउनेछु’, उनले भनिन् ।

एनआरएनए इंग्ल्यान्ड अध्यक्षका रुपमा इंग्ल्यान्डका नेपाली समुदायको ग्रासरुटसम्म एनआरएनए अभियानलाई पुर्‍याउने अठोट अहिल्याले गरेकी छन्।

नेपाली नागरिकता निरन्तरता, भूतपूर्व गोर्खाहरुको समान अधिकार, एनआरएनएमा महिला र नयाँ पुस्ताको सहभागितालगायतका एजेन्डामा प्रभावकारी अभियान गर्ने प्रतिबद्धता उनको छ ।

बेलायतको नेपाली समुदायमा विभिन्न संघसंस्थामा आबद्ध रहेर सामाजिक कार्यमा सक्रिय छन् अहिल्या। बेक्सली नेपाली समाजमा उपाध्यक्ष रहेकी उनले पासा पुचः गुथि साउथ इष्ट लन्डनमा सचिव, नेपाली साहित्य विकास परिषद यूके सहमहासचिवलगायत जिम्मेवारी सम्हालेकी छन् ।