लन्डनमा श्रष्टाले सुनाए नेवारी कविता, लोककवि जकमीलाई सम्मान

लन्डन । नेपाल भाषा र नेवा संस्कृति उत्थानका लागि लन्डनमा स्थापित मतिना फाउन्डेसनले लोककवि राजभाइ जकमीलाई सम्मान गरेको छ। 

फाउन्डेसनले शनिबार एक कार्यक्रमबीच जकमीलाई सम्मान गरेको हो । 

समारोहमा विशेष अतिथि महन्त श्रेष्ठ ‘ओबीइ’ ले लोक कविलाई ढाकाको पछ्यौरा ओढाउंदै ‘अ पोइट अफ द हार्ट’ कुंदिएको शिल्ड प्रदान गरे भने अध्यक्ष रचना श्रेष्ठले मानार्थ सदस्यको उपाधि प्रदान गरिन् । 

बालिका नोभा श्रेष्ठको नेपाली राष्ट्रिय गान संगै शुरु भएको उक्त कार्यक्रममा फाउन्डेसनकी अध्यक्ष रचना श्रेष्ठले नेपालबाट आएका लोक कविसहित सहभागीहरूलाई स्वागत गरेकी थिइन्।

सो अवसरमा लोककवि जकमीले नेवारी कविता सुनाए । कार्यक्रममा लोक कविले नेवा: महान व्यक्तित्वहरूमा समर्पित गीतहरू पनि प्रस्तुत गरे । लोककवि जकमीले आफूले लेखेका नेपाल भाषाका बालगीत (राइम्स) हरु रमाइलो तरिकाले प्रस्तुत गरेर कार्यक्रमको रौनक बढाएका थिए ।

साथै ज्ञानी शोभा तुलाधर र शशी महाजुले पनि आफ्ना कविताहरू वाचन गरे । डा. शान्त वीर सिंह तुलाधरको कविता ज्ञानी शोभा तुलाधरले वाचन गरेकी थिइन् भने निर्मला स्थापितले कवि सिद्धिचरण श्रेष्ठको नेपाल भाषामा लिखित प्रसिद्ध कविता ओखलढुंगा र डा. संगीता स्वेच्छाको कविता नेपाल भाषामा अनुवाद गरेर सुनाइन् । 

सदस्य निलिमा श्रेष्ठले सञ्चालन गरेको उक्त कार्यक्रममा संस्थाकी अर्की सदस्य निर्मला स्थापितले धन्यवाद मन्तव्य दिंदै समापन गरेकी थिइन् ।