बेलायतमा विद्युतीय कार किन्न प्रोत्साहन, ३७५० पाउन्डसम्म छुट उपलब्ध

लन्डन- बेलायत सरकारले विद्युतीय सवारी साधन प्रयोगलाई प्रोत्साहन गर्न आर्थिक सहयोग योजना ल्याएको छ । जसअन्तर्गत ग्राहकहरूले नयाँ विद्युतीय कार खरिदमा ३ हजार ७ सय ५० पाउण्डसम्मको छुट प्राप्त गर्न सक्नेछन्।

यो योजनाले विद्युतीय कारको बढ्दो लागत कम गरी सर्वसाधारणका लागि विद्युतीय सवारीको स्वामित्व सहज बनाउने लक्ष्य राखेको छ।

बेलायत सरकारले ल्याएको अनुदान योजनामा दुई फरक तहका छुटहरु छन् । जसअनुसार ३ हजार ७ सय ५० पाउण्डको अधिकतम छुट फोर्ड पुमा जेन इ र फोर्ड इ टर्निओ कुरियर मोडलका कार किन्दा पाउन सकिन्छ । १ हजार ५ सय पाउण्डको छुट पाइने विद्युतीय कारहरु भने अरु थुप्रै छन् ।

सिट्रोन, कुप्रा, डिएस, पजो, रेनउ, निसान, भक्सल, भक्सवागनजस्ता विभिन्न कम्पनीका विद्युतीय कारका २६ भन्दा बढी मोडेलहरू १ हजार ५ सय छुटका लागि योग्य छन्।

यो छुट ३७ हजार पाउण्डको मुल्यभित्रका नयाँ कारहरु खरिद गर्दा मात्र उपलब्ध हुनेछन् ।

बेलायत सरकारले ६५० मिलियनको ‘इलेक्ट्रिक कार ग्रान्ट’ योजनाअन्तर्गत यी विद्युतीय कार किन्दा छुट उपलब्ध गराएको हो । छुट रकम कार किन्दा नै स्वतः लागू हुनेछ, जसका लागि कुनै अतिरिक्त कागजात आवश्यक पर्ने छैन। यो योजना सन् २०२८–२०२९ को आर्थिक वर्षसम्म जारी रहने जनाइएको छ ।

बेलायत सरकारले सन् २०३० देखि पेट्रोल तथा डिजेल कारहरुको बिक्रीमा पूर्ण प्रतिवन्ध लगाउने योजना बनाएको छ । तर, विद्युतीय कारहरु तुलनात्मक रुपमा बढी महंगो पर्ने र बेलायतमा आवश्यक पूर्वाधार समेत पर्याप्त रुपमा तयार नभएको आम गुनासो रहेकाले सरकारको लक्षित योजना कार्यान्वयन हुनेमा भने आशंका नै छ ।

बेलायती सडकमा हाल १३ लाख बढी विद्युतीय कार गुडिरहेकोमा चार्जिङ पोइन्टहरु भने ८२ हजार मात्रै छन् ।