बेलायत भ्रमण सकेर फर्किए कुलमान

लन्डन- नेपाल विद्युत प्राधिकरणका पूर्व कार्यकारी निर्देशक तथा उज्यालो नेपाल अभियानका अभियन्ता कुलमान घिसिङ झण्डै तीन साता लामो बेलायत भ्रमण पूरा गरी नेपाल फर्किएका छन् ।

तमुधिं यूकेको आयोजनामा गत आइतबार लन्डनमा सम्पन्न १६ औं नेपाली मेलामा विशेष अतिथिका रुपमा सहभागी हुन बेलायत आएका उनी शुक्रबार लन्डनबाट नेपाल प्रस्थान गरेका हुन् ।

अध्यक्ष जुमकाजी गुरुङ नेतृत्वको तमुधिं यूके टोलीले लन्डन विमानस्थल पुगेर कुलमानलाई बिदाइ गरेको छ ।

उनको बिदाइका लागि एनआरएनए आइसीसी सदस्य दिलरस गुरुङ, एनसिआई ग्रुप यूके अध्यक्ष मोहन गुरुङ, एलएन पाण्डे, धादिङ नुवाकोट समाज अध्यक्ष धन तामाङ, चलचित्रकर्मी प्रेम लामा, सञ्चारकर्मी मिलन तमुलगायत पनि विमानस्थल पुगेका थिए ।

तमुधिं यूके अध्यक्ष जुमकाजी गुरुङले कुलमानलाई बिदाइ गर्दै नेपाली मेलामा विशेष अतिथिका रुपमा सहभागिताका लागि तमुधिं युकेले दिएको निम्तो स्वीकार गरी बेलायत आएकोमा आभार प्रकट गरेका थिए ।

यसअघि अगष्ट ११ तारिख लन्डन उत्रिएका कुलमान बीचमा केही दिन युरोप पुगेपनि अधिकांश समय बेलायतकै नेपाली समुदाय भेट्न व्यस्त थिए ।

बेलायतस्थित दर्जनौं नेपाली संघसंस्था र समुदायले आयोजना गरेको सम्मान तथा अन्तरक्रियामा उनले भाग लिएका थिए । विभिन्न देशको भ्रमण दौरान बेलायत आएका उनले यहाँका नेपाली भेटेर आफ्नो उज्यालो नेपाल अभियानमा समर्थनका लागि आव्हान गरे ।

बेलायतमा रहंदा उनले बेलायती सांसद र अरु केही प्रतिनिधिसंग पनि भेटवार्ता गरेका थिए ।

तस्विर: मिलन तमु