स्कटल्यान्डमा त्याग गरी सर्वसम्मति बनाएका कंडेल एनआरएनए यूके उपाध्यक्षमा मत माग्दै

लन्डन– गैरआवासीय नेपाली संघ (एनआरएनए) यूकेको आसन्न निर्वाचनमा स्कटल्यान्डबाट प्रतिनिधित्व गर्ने एनसीसी उपाध्यक्षमा उम्मेदवार छन् रामप्रसाद कंडेल । दुई दशक लामो सामाजिक क्षेत्रको अनुभव संगालेका उनी पछिल्लो समय एनआरएनए अभियानमा पनि सक्रियतासाथ खटिएका छन् ।

एनआरएनए स्कटल्यान्ड राज्य परिषदका वर्तमान कार्यसमिति सचिव कंडेलकै व्यक्तिगत त्यागमा यसपटक एनआरएनए स्कटल्यान्डमा सर्वसम्मति सम्भव बनेको छ । परिषदको अध्यक्ष पदमा उम्मेदवारी घोषणा गरी चुनावी अभियानमा लागेका कंडेलले स्थानीय अग्रज र सहकर्मी अभियन्ताहरुको आग्रह स्वीकार गर्दै अध्यक्ष उम्मेदवारीबाट ‘ब्याक’ हुन राजी भए । उनको त्यही त्यागकै परिणामस्वरुप एनआरएनए स्कटल्यान्ड परिषदमा सर्वसम्मत कार्यसमिति चयन हुन सफल भयो ।

राज्य परिषदमा पछि हटेर सर्वसम्मति बनाएका कंडेल यतिबेला स्कटल्यान्डबाट प्रतिनिधित्व गर्ने उपाध्यक्षको उम्मेदवारका रुपमा चुनावी मैदानमा छन् । स्थानीय अग्रज एवम् अभियन्ताहरुको सल्लाह र हौसलामा आफू एनआरएनए यूके एनसीसीमा उपाध्यक्ष उम्मेदवार बनेको उनले बताए ।

‘स्कटल्यान्ड राज्य परिषदको सचिवका रुपमा विगत दुई वर्ष मैले इमान्दार र समर्पित भएर आफ्नो भूमिका निर्वाह गरे । यो अवधिमा मैले संस्थालाई बुझ्ने मात्र हैन, अब कस्तो नीति र नेतृत्व आवश्यक छ भनेर महसुस गर्ने मौका पनि पाएं’, कंडेलले नेपालीलिंकसंग भने, ‘त्यसैले मैले स्वभाविक उम्मेदवारका रुपमा परिषदको अध्यक्षमा दाबी गरें । तर पछि साथीभाइको आग्रहलाई ध्यानमा राख्दै आफ्नो व्यक्तिगत आकांक्षालाई थाती राखेर सर्वसम्मति बनाउनका लागि त्याग गरें ।’

व्यक्तिगत आकांक्षाभन्दा संस्थाको हित र एकता नै बढी महत्वपूर्ण ठान्ने कंडेलले एनसीसी यूके उपाध्यक्षको आफ्नो उम्मेदवारीमा सबैको साथ, समर्थन अपेक्षा गरेका छन् । ‘संस्था र समुदायको हितका लागि म पछि हटेरै भएपनि त्याग गर्न पनि तयार भएं । सबैको सल्लाह सुनेर नै एनसीसी उपाध्यक्षमा उम्मेदवार बनें । त्यसैले अब सबैले मलाई साथ दिनुहुन्छ भन्ने आशा लिएको छु’, उनले भने ।

एनआरएनएसहित विभिन्न सामाजिक संघसंस्थाहरुमा लामो समयदेखि संगालेको अनुभव र शुभेच्छुकहरुको सल्लाहबाट प्रेरित भएर उम्मेदवारी दिएका कंडेलले एनआरएनए यूकेलाई सबल र सक्षम बनाउन योगदान दिने प्रतिवद्धता गरेका छन् ।

एनआरएनए यूकेलाई सदस्यकेन्द्रित, समावेशी र पारदर्शी बनाउने, महिला नेतृत्व, सीप विकास र उद्यमशिलतालाई प्रोत्साहन गर्ने, नयाँ पुस्ताको सहभागिता बढाउने, एनआरएनए यूकेलाई बेलायतमा अध्ययनरत नेपाली विद्यार्थीको अभिभावक बनाउने, आपतकालीन सहयोग र कल्याणकारी कोष सुदृढ बनाउने, नेपाली कला, संस्कृति प्रवर्द्धन गर्नेलगायतका कार्यमा सशक्त भूमिका निर्वाह गर्ने प्रतिवद्धता कंडेलको छ ।

विगतमा विभिन्न जिम्मेवारीमा रहंदा नतिजा देखिने गरी गरेको आफ्नो योगदानको मूल्यांकन बेलायतवासी नेपालीहरुले गर्ने विश्वास उनको छ ।

एनआरएनए स्कटल्यान्डका हालसम्मका सबैजसो कार्यसमितिमा रहेर काम गरिसकेका कंडेलले विभिन्न कार्यक्रम र अभियानमा संयोजनकारी तथा नेतृत्वदायी भूमिका निर्वाह गरेका छन् । पशुपतिनाथ मन्दिर स्कटल्यान्डमा समेत सचिव रहेका उनी अन्य विभिन्न सामाजिक संघसंस्था र अभियानमा पनि सक्रिय छन्।

स्कटल्यान्डमा नेपाली दूतावासको घुम्तीसेवा, पहिलो नेपाली मेलाजस्ता कार्यक्रमहरुको संयोजनदेखि एनआरएनए र स्थानीय समुदायका सबै कार्यक्रम तथा अभियानमा पनि कंडेलले सक्रिय भूमिका निर्वाह गरेका छन् ।

संस्थालाई बुझेको र वर्षौंसम्म सशक्त काम गरेको आधारमा पनि आफ्नो उम्मेदवारी जायज र सशक्त रहेको उनले विश्वास लिएका छन् ।

बेलायतवासी सबै नेपालीहरुबाट साथ, सहयोग आव्हान गर्दै कंडेलले भनेका छन्, ‘यहाँहरुले दिनुभएको हौसलाले नै दुई दशकभन्दा लामो समयदेखि सामाजिक कार्यमा छु । अहिलेसम्म धेरै फोकस स्कटल्यान्डमै भयो । अब बेलायतभरको नेपाली समुदायसंग काम गर्न उत्साहित छु । स्कटल्यान्ड र सिंगो बेलायतको नेपाली समुदायलाई जोड्न र सद्भाव, सहकार्य बढाउंदै अघि बढ्न निरन्तर कोशिस गर्ने वचनवद्धता व्यक्त गर्दछु ।’