लन्डनको विशेष आकर्षण ‘विन्टर वण्डरल्याण्ड’ यो वर्ष नहुने

लन्डन । लन्डनको विशेष आकर्षण हाइड पार्क कर्नरमा प्रत्येक वर्ष गरिने ‘विन्टर वण्डरल्याण्ड’ नामक एक विशाल क्रिसमस मेला यो वर्ष नहुने भएको छ ।

मध्य नोभेम्बरदेखि जनवरी पहिलो हप्तासम्म संचालन गरिने उक्त मेला यसपटक कोरोना संक्रमणका कारण स्थगित गर्ने घोषणा गरिएको हो । स्वास्थ्य सुरक्षा तथा यात्रा प्रतिबन्ध जस्ता विविध कारणले यो वर्ष कार्यक्रम स्थगित गरिएको आयोजकले बताएका छन् ।

वर्तमान परिस्थितिलाई मध्यनजर गर्दा मेला गर्न कुनै पनि विकल्प नभएको बताउंदै आयोजकले सन् २०२१ को ‘विन्टर वण्डरल्याण्ड’ भव्य रुपमा गरिने बताएका छन् । ‘यो समाचार सबैका लागि दुःखद हुनेछ, धेरै मानिस पक्कै निराश हुनेछन्’- आयोजकले भनेका छन् ।

युरोपकै आकर्षक र लोकप्रिय मानिने उक्त मेलामा सर्कस, आइस शो, लाइभ म्यूजिक, रोलर कोष्टर, विभिन्न किसिमका स्टल लगायत थुप्रै बार तथा रेष्टुरेन्ट संचालन हुने गर्दछन्  ।

दशौँ लाख मानिसको भीड लाग्ने ‘विन्टर वण्डरल्याण्ड’ मा बालबालिकादेखि वृद्धवृद्धा समेत रमाउने गर्दछन् । सन् २००७ बाट निरन्तर गरिंदै आएको उक्त मेलामा निशुल्क प्रवेश व्यवस्था हुने गर्छ ।