बुधबार, मंसिर १०, २०७७
10:10 | १५:५५

कोरोना रोकथामका प्रयास सही दिशामा: उच्चस्तरीय समिति

रासस मे ४, २०२०

काठमाडौँ । ‘कोभिड-१९’ रोकथाम तथा नियन्त्रण उच्चस्तरीय समितिले कोरोना नियन्त्रणका लागि अहिलेसम्म भएका प्रयासहरु सफल भएको निष्कर्ष निकालेको छ ।

सिंहदरबारस्थित प्रधानमन्त्री तथा मन्त्रिपरिषद्को कार्यालयमा सोमबार बसेको समितिको २२औँ समीक्षात्मक बैठकमा कोरोना नियन्त्रणका सम्बन्धमा समितिले अहिलेसम्म गरेका प्रयासहरु सही दिशामा भएको निष्कर्ष निकालिएको हो ।

‘समितिले कोरोना रोकथामबारे गरेका प्रयासहरु सही दिशामा नै भएको आजको बैठकमा समीक्षा गरिएको छ, लकडाउन यही वैशाख २५ गतेसम्म छ, सबै तयारी गरे मंगलबार बस्ने बैठकले केही निर्णयहरु गर्नेछ, त्यसको लागि गृहकार्य भइरहेको छ’, समितिका प्रवक्ता नारायणप्रसाद विडारीले भने ।

उनले अहिलेसम्म ‘पिसीआर’ विधिबाट १३ हजार ४२० र ‘आरडिटी’ बाट ४९ हजार ६८८ को परीक्षण भइसकेको जानकारी दिँदै तराईका केही क्षेत्रहरुमा संक्रमितको संख्या बढिरहेको अवस्थालाई अध्ययन गरेर मात्रै मंगलबारको बैठकले बन्दाबन्दीबारे मन्त्रिपरिषद्लाई सिफारिस गर्ने बताए ।

प्रवक्ता विडारीले भने, ‘सबै अवस्थालाई सँगसँगै विश्लेषण गर्दै आर्थिक जनजीवनलाई अझ सहज पार्ने ढंगमा र रोगको संक्रमणलाई आफ्नो नियन्त्रणमा राख्ने सिलसिलामा के गर्न सकिन्छ ? २५ गतेपछि कसरी अगाडि बढ्न सकिन्छ भन्ने खालको समीक्षात्मक बैठक आज भएको हो ।’

कोरोनाको जोखिम कम भएका केही पहाडी क्षेत्रहरुमा लकडाउन हटाउनुपर्छ भन्नेबारे संसदीय समितिबाट सुझावहरु आएको र ती सुझावलाई पनि मनन गरिएको उनको भनाइ छ ।

प्रतिक्रियाहरू

सम्बन्धित सामग्रीहरू